Ginbawian na sang kabuhi ang driver nga ginkawatan sang tricycle kag ginlampusan sang bato sa bahin sang Bacolod Economic Highway, Hacienda Gonzaga, Brgy. Mansilingan sa ciudad sang Bacolod, las-2:30 sang hapon, Enero 27. Ang biktima ginkilala kay alyas Edmund, legal ang edad kag residente sang Brgy. Taculing samtang ang suspetsado ang ginkilala kay alyas Almer, 37-anyos kag residente sang amo nga lugar. Ginpahayag ni Police Captain Dax Santillan, Station Commander sang Bacolod City Police Station 7, nakit-an na lamang ang biktima nga nagahigda sa hilamunan nga bahin sa kilid sang dalan kag gilayon gindala sa Corazon Locsin Montelibano Memorial Regional Hospital para sa nagakaigo nga pagbulong apang makaligad ang pila ka oras, ini ang ginbawian sang kabuhi. Base naman sa imbestigasyon, nagpa kuno-kuno ang suspek nga pasahero kag nagsakay sa tricycle nga ginamananeho sang biktima kag nagsiling nga magapadul-ong kuntani sa Hda. Gaunzon apang sang pag-abot sa lugar sang insidente ginlampusan sang suspek sang bato ang ulo sang biktima kag ginmaneho ang tricycle palagyo kag ginbilin ang biktima sa lugar. Natigayon naman nga nadakop ang suspetsado sang mga katapo sang Bago City Police Station kag Police Station 7 kag narekober ang tricycle. Na-file na sang kapulisan ang kaso batok kay Almer nga robbery with homicide.
