Nagdangat sa P2,978,400 ang balor sang iligal nga druga nga nakumpiskar sang Bacolod City Police Office sa sulod sang isa ka semana humalin Enero 20 tubtob 26, 2025. Ini sandig sa operational accomplishment report sang BCPO may kaangtanan sa kampanya batok sa iligal nga druga. Base sa report, naglab-ot sa 13 ka mga persona ang arestado gikan sa Pito ka mga operasyon nga ginpatigayon kun sa diin nagdangat naman sa 443 grams sang sang iligal nga druga ang narekober. Samtang, tatlo naman ka mga most wanted person sa ciudad ang natigayon nga nadakup kaupod sang walo ka mga persona nga ginakabig man nga wanted. Sa pihak nga bahin, anum naman ang arestado gikan sa ginpatigayon nga operasyon batok sa illegal gambling kun sa diin nakakuha ang BCPO sang ginkabug-usan P720 bet money. Padayun naman nga komitido ang BCPO kag wala naga-untat sa kampanya batok sa iligal nga druga sa ciudad kag nagahingyo sa publiko nga ireport ang bisan ano nga makaduluda nga mga aktibidad pinakamalapit nga istasyon sang pulisya.
