Ginbawian sang kabuhi ang isa ka lapsag nga lalaki matapos ini ang nagmasakit sa isa ka evacuation center sa banwa sang La Castellana.
Ginkumpirmar ni Provincial Health Officer Dr. Girlie Pinongan nga gin-diagnose nga may pneumonia ang bata, nga nag-evacuate upod sa iya pamilya gikan sa Barangay Cabagnaan, La Castellana matapos ang paglupok sang Bulkan Kanlaon tinalikdan nga Disyembre.
Base sa record, nagbatyag sang nagabalik-balik nga hilanat kag ubo ang bata sa evacuation center rason nga ini ang gindala sa pribado nga doctor kun sa diin siya gin-resetahan sang antibiotics.
Apang nakita sang katapo sang municipal health office nga dehydrated na ang bata rason nga ini ang gindala sa Ignacio L. Arroyo Memorial District Hospital sa banwa sang Isabela kun sa diin ini ang ginbawian sang kabuhi sang amo man nga adlaw.
Sa official record, ang lapsag nagtaliwan bangud sang Septic Shock due to Sepsis secondary to Community Acquired Pnuemonia.
Ginkumpirmar ni Dr. Pinongan nga ang pasyente ang ikaduha na nga lapsag nga nagmasakit sa evacuation center kag ginbawian sang kabuhi.
Madumduman nga sadtong Disyembre 25, isa ka 9-month old man nga lapsag nga evacuee gikan sa Barangay Masulog, La Castellana ang napatay sa Don Salvador Benedicto Memorial District Hospital sa La Carlota matapos naglain ang tiyan kag nagpalanuka.
