Ginahingyo ni Bacolod City Police Office (BCPO) Director Police Colonel Joeresty Coronica ang publiko nga indi mag-ubra-ubra sang istorya nga makahatag sang malain nga imahe sa mga katapo sang Philippine National Police (PNP).
Sa interview sang DYHB kay Coronica, ginpahayag sini nga kun wala man lang sang proweba nga nagapakita sang involvement sang mga katapo sang kapulisan sa mga nagakatabo mga krimen sa ciudad, mas maayo nga indi nalang ini pag istoryahan.
Kun matabuan gid man nga may proweba ang mga alegasyon kontra sa kapulisan, mas maayo nga ipresentar ini sa ila agud maimbestigaran.
Panugyan sini nga dapat i-file sang publiko sa proper forum ang ila reklamo agud ma-address ini kag mahatagan sang nakaigo nga atensyon.
Sa madumduman, may mga tawo nga nagatudlo sa kapulisan nga sila ang nakita sa CCTV footage nga nagkuha sa babayi kag ginpasulod ini sa awto.
Ginklaro naman ni Coronica nga wala sang imbolbado nga mga pulis sa natabo mga ginaalegar abduction sa barangay Banago tinalikdan nga semana.
Kag mismo ang Police Station 3 ang nagklaro man nga wala sang abduction nga natabo.
Ginasigurado man ni Coronica nga sa idalom sang iya leadership, indi pwede ang hudlom ukon sindikato sa PNP. Kag kun may ara man, dapat i-report kag ila ini pagaimbestigahan kag ini ila kasuhan kung may ipresenta nga proweba.
