Ginpasakaan na sang kaso nga Murder ang suspetsado nga nagluthang sa isa ka security guard sa Zone 1, Barangay Handumanan, Bacolod City alas-5:10 sang hapon tinalikdan nga Enero 22, 2025.
Nahibaluan nga ang biktima sang pagpangluthang ang ginkilala kay Arnold Caballes 37-anyos, residente sang Barangay Cabug samtang ang suspek naman ang ginkilala nga si alyas Intong nga residente sang Barangay Felisa.
Madumduman nga pareha nga naga-maneho sang motor ang suspek kag biktima apang hinali lang nga ginbungguan sang suspek ang biktima nga nagresulta sang pagkatumba sini.
Gilayon naman nga nagpagwa sang armas-luthang ang suspek samtang nagahambal ang biktima nga indi ini pagtiruhon bangud may ginasagod pa apang nagsabat ang suspek nga wala ini sang labot sa iya nga problema kag gintiro ini sang maka-lima ka beses kag madasig nga nagpalagyo.
Base sa report sang Bacolod City Police Office (BCPO) natigayon na nga napasakaan sang kaso si alyas Intong nga nagamaneho sang pula nga duag sang motor kag nagasuksok sang t-shirt nga may pula kag puti nga duag nga base sa kuha sang CCTV malapit sa lugar sang ginhimo ang krimen.
