Natalana nga patigayunon ang business summit sang Bacolod City Government sa isa ka Hotel sa ciudad, subong nga adlaw, Pebrero 7, 2025. Ang nasambit nga summit ang ginakabig bilang oportunidad para mapakita kag mapresentar sang Bacolod ang master plan sini sa mga ginpang-imbitar nga mga stakeholders gikan sa mga dalagko nga mga real estate developers, business establishment, kag investors. Ginpahayag ni Bacolod City Mayor Albee Benitez, ini ang isa ka tikang para mapresentar ang ginahandum kag plano nga mangin super city ang ciudad lakip na ang pagpatukod sang mga distrito ukon ang pagtunga sang Bacolod sa north, east, west, kag south nga districts. Suno sa alkalde, isa ini ka pamaagi para mas madamo ang investment opportunities sang ciudad ilabi na sa bahin sang mobility, sustainable urban development kag ecological resilience.
