Hugot sa karon nga ginabantayan sang PHIVOLCS Kanlaon Volcano Observatory sa La Carlota City ang mga parameters sang Bulkan Kanlaon kasunod sang minor explosive eruption kahapon sang hapon.
Ginpahayag sang resident volcanologist nga si Mari-Andylene Quintia nga lakip sa ila nga ginabantayan ang ground deformation sa lawas sang bulkan, subong man ang ginabuga sini nga sulfur dioxide kag ang seismicity ukon pagtay-og.
Nahibaluan nga manubo ang SO2 emission sang Kanlaon sa nakaligad nga duha ka adlaw nga yara lamang sa 1,000 tubtob 2,000 tonnes per day.
Antes ang paglupok kahapon, wala man sang ash emissions nga na-record apang may mga pagtay-og nga nabalhag.
Suno kay Quintia, posible nga nasupunan ang baba sang bulkan kag nagtaas ang pressure sang gas sa idalom sini rason sang paglupok.
Sa pihak sini, nagapabilin sa Alert Level 3 ang Bulkan Kanlaon sa karon apang suno kay Quintia, posible magsaka ini sa Alert Level 4 kag malauman ang major eruption kun may abrupt ukon hinali nga pagbag-o sa nasambit nga mga parameters.
Sa karon, padayon ang paghabok sang lawas sang bulkan apang amat-amat lamang ini. Kun hinali magdasig ang paghabok, magnubo ang SO2 emission kag magtayuyon ang pagtay-og, posible senyales ini sang palaabuton nga daku nga paglupok sang Kanlaon.
