Ginpasidunggan sang Local Government Unit sang Sagay City ang tatlo ka mga estudyante sang Eusebio Lopez Integrated School sa ila sini honesty matapos nga ginbalik sang mga ini ang envelope nga may unod sang pila ka mga importante nga mga dokumento lakip na ang P157,000 nga kwarta. Ginkilala ang tatlo ka mga estudyante nga sanday Jia Rebadomia, Kianna Respondo kag Veronica Sinadhan lunsay mga Grade 10 student sang nasambit nga eskwelahan. Base sa impormasyon, nakita sang mga estudyante ang envelope nga yara sa dalan nga sakop sang Barangay Paraiso malapit sa Sto. Rosario Parish Church kag gilayon nga ginbalik ini sa tag-iya sang envelope nga si Reoper Cegayle. Nahibaluan nga ang pagkadula sang envelope ang gin-post pa sa Facebook kun sa diin nakita ini sang mga estudyante kag madasig nga nagpakig-angut sa tag-iya. Suno kay Vice Mayor Leo Rafael Cueva, natigayon sini nga nakuha ang pahayag sang isa ka iloy gikan sa tatlo ka estudyante nga nagsiling nga dapat iuli sa tag-iya ang kwarta bangud kinahanglanon man ini ilabi na kun ang kwarta naghalin sa iya kinabudlayan. Nagpalab-ot naman sang pagdayaw ang ciudad sa tatlo ka mga estudyante kag nagalaum nga mangin halimbawa sa iban ang ila sini ginhimo.
