Santo sa imbestigasyon sang La Libertad Municipal Police Station, samtang naga-roving ang watchman nga si Dino Gomez, ginpalapitan ini sang anom ka armado nga kalalakin-an nga nagpakilala mga NPA. Siya ang ginpamangkot kon ang Limkaichong family amo ang nagapaobra sang dalan kag ini ang nag-ako man. Apang nakahibalo ang watchman nga ang proyekto ang gina-sub contract sang project engineer nga si Rodolfo Ybarreta.
Matapos gin-usisa, ginpasulod si Gomez sang mga kakalihan sa iya balay sa diin na-park naman ang dump truck. Samtang nagapadulong sa iya balay, nakita ni Gomez nga may kapin 30 ka mga indibidwal nga nagabantay sa kilid dalan.
Isa sa mga armado nga lalaki ang nakita ni Gomez nga may dala nga gasolina. Matapos nga ginpasulod sa iya balay, nakita na lamang ni Gomez nga ginsunog na ang dump truck kag pila pa ka mga equipments nga ginsundan pa sang linupok sang armas. Matapos ang kapin isa ka oras, nakita ni Gomez nga nagpalagyo ang mga armado sa direksyon sang Brgy. Amuntay, Isabela, Negros Occidental.
Sang gin-usisa naman si Ybarreta, ginpahayag sini nga halin sang nagsugod ini sang road concreting sa La Libertad, wala man ini nakabaton sang demand letter gikan sa mga NPA. Narekober sa lugar ang 15 ka empty shells sang M16, isa ka live ammunition ukon bala sang M16 kag AK47.