PROVINCIAL CAPITOL – Balantayan ang mangin aktibidad sang Bulkan Kanlaon kasunod sang duha ka adlaw nga wala sang nagluntad nga ash emission. Ginpahayag ni PHIVOLCS Director Teresito Bacolcol nga possible nasupnan ang baba ukon conduit sang bulkan rason nga wala ini nagbuga sang abo. Kaangay man sini ang natabo antes ang minor explosive eruption nga nagluntad sadtong Pebrero 6 kun sa diin naghagan-hagan ang pagluntad sang ash emission activity, volcanic earthquakes kag subong man ang kadamuon sang sulphur dioxide nga nagguwa sa baba sini. Samtang, ginkumpirmar ni Bacolcol nga padayon nga nagahabok ang eastern portion sang Bulkan Kanlaon nga nagapatimaan sang padayon nga pagsaka sang magma.
