Nagpatigayon sang hot pursuit operation ang mga katapo sang Philippine Army 62nd Infantry Battalion batok sa mga rebelde nga suspetsado sa pagsunog sang mga heavy equipment sa Barangay Aya, La Libertad, Negros Oriental. Ginpahayag ni Lieutenant Colonel Evelio Ilanga III, Commander sang 62nd IB, nagtuga sang paghalit sang gina-ubra nga farm to market road ang ginbuhat sang mga rebelde nga pag sunog sang duha ka backhoe, dump truck, kag pison, ilabi na nga isa ini kuntani ka proyekto nga makabulig sa pumuluyo nga mag-transport sang ila produkto. Gina-alegar remnants sang Central Negros 1 New People’s Army ang sa likod sang amo nga kahimuan ilabi na nga gin-ako naman sang mga rebelde nga sila ang sa likod sang pagpanunog. Ginkabig ni Ilanga, nga propaganda lamang ang ginapagwa nga impormasyon sang mga rebelde nga ang amo nga proyekto ang para sa pagpamina, reforestation kag iban pa. Pagatingwaan sang militar nga madakpan ang mga rebelde agod indi na maliwat ang kaangay nga insidente. Natalana man nga makighinun-anon ang 62nd IB sa kapulisan agod ma-assess ang lugar ilabi na sa nagahilapit nga election.
