Isa ka ginaalegar remnant sang Central Negros Front 1 ang ginbawi-an sang kabuhi sa nagluntad nga engkwentro kagab-i, Pebrero 10,2025 sa Barangay Tala-on, La Libertad, Negros Oriental.
Ginkumpirma ni 62nd Infantry Battalion Commander LtCol. Evelio Ilaga nga may natabo nga engkwentro kagab-i sa tunga sang tropa sang 62nd IB kag apat ka mga NPA.
Ang nagtaliwan nga NPA ang ginkilala kay Alyas Gamatoy Rolito Tanillos.
Ang engkwentro ang natabo matapos nagpatigayon sang hot pursuit operation ang army sa lugar bangud sa una na natabo nga pagsunog sang pila ka mga katapo sang rebelde sa mga heavy equipment sa gina-ubra nga farm to market road sa Brgy. Aya, La Libertad.
Suno kay Ilaga, posible nga ang grupo nga ila na engkwentro amo ang mga tawo nga responsable man sa pagpangsunog sa mga equipment.
Ginapatihan nga ang mga rebelde ang tuyo kun tani magtabok padulong sa mga banwa sang Binalbagan kag Isabela sa probinsya sang Negros Occidental.
Isa ka M14 rifle man ang na-recover sang mga militar sa encounter site. Padayon pa sa karon ang clearing operationsa sang tropa sa lugar.
