Padayon pa nga ginadihon sang Commission on Elections ang ila nga contingency plan para sa paghiwat sang Mayo 12 nga National and Local Elections pananglitan magsaka sa Alert Level 4 ang Bulkan Kanlaon.
Ginpahayag ni Negros Occidental Provincial Election Supervisor Atty. Ian Lee Ananoria nga plastado na ang contingency plan para sa Alert Level 3 samtang ginatapos pa ang para sa Alert Level 4 bangud may kinalain sa disaster planning.
Ini bangud may mga botante nga iga-evacuate sa iban nga banwa ukon ciudad.
Suno kay Atty. Ananoria, posible nga may mga manunudlo, nga nagaserbe nga katapo sang Electoral Board, ang apektado man sang pag-alburuto sang bulkan.
Sa sini, ang Philippine National Police amo ang iga-tap kag igapaidalom sa nagakaigo nga training agd mag-serve bilang Electoral Board members.
Suno kay Atty. Ananoria, magatuman sila sa general rule nga kun sa diin nahamtang ang mga botante, didto hiwaton ang eleksyon kun sa diin pagadal-on ang mga vote counting machines sa gamiton nga classrooms ukon makeshift nga polling centers.
