Wala sang may narekord nga ash emission event ang Philippine Institute of Volcanology and Seismology (PHIVOLCS) sa bulkan Kanlaon sa sulod na sang apat ka adlaw.
Halin sang natabo ang minor eruption sa bulkan tinalikdan nga Pebrero 6, nagkanay-kanay na ang pagbuga sang bulkan sang abo.
Naglab-ot naman sa 4,150 ka tonelada sang sulfur dioxide ang ginbuga sang Mt. Kanlaon kahapon nga adlaw, Pebrero 10,2025 tubtob las 12 kaina sang kaagahon, Pebrero 11. Halos doble ini sang narekord nga pagbuga sang asupre tinalikdan nga adlaw sa diin yara lang ini sa 2,183 tonnes a day.
Samtang, siyam ka volcanic earthquakes naman ang narekord sang Phivolcs sa sulod sang 24-oras.
Padayon naman ang pagsungae sang bulkan sa diin nagatakos sang 75 metros ang kataason sang aso nga nagagwa sa baba sini.
Nagapadayon naman ang ground deformation sang bulkan sa sini nga mga tinion. Sa karon, padayon nga ginadumilian ang pagpalupad sang ano man nga sahi sang aircraft malapit sa baba sang bulkan.
Ginaabisuhan ang tanan nga may posibilidad sa gihapon sang gulpi nga paglupok sang bulkan, pag-ilig sang lava, pag-ulam sang abo, Pyroclastic Density Current (PDC), rockfall kag pagbaha sang lahar kun may mabaskog nga pag-ulan. Nagpabilin sa gihapon sa alert level 3 ang Mt. Kanlaon.
Nagpabilin sa gihapon sa alert level 3 ang Mt. Kanlaon.
