Nagbaton sang ayuda ang 57 ka mga pamilya nga apektado sang nagluntad nga sunog sa Purok Pasil, Barangay Zone 5, ciudad sang Talisay, pasado ala-una sang hapon, Pebrero 4, 2025. Ang kada-pamilya ang nakabaton sang tag-P25,000 nga ginkabug-usan sang P10,000 gikan sa City Government sang Talisay, P5,000 gikan sa Barangay, P5,000 gikan sa Uswag Ilongo Partylist kag dugang nga P5,000 gikan naman sa pamilya ni Mayor Neil kag Atty. Weng Lizares nga personal nga nagdul-ong sang bulig samtang naghatag naman sang mga kawayan si Vice Mayor Nic Jalandoni. Magluwas sa cash assistance, naghatag man ang ciudad sang 10 panid sang Galvanized iron,tagduha ka panid sang plywood kag iban pa nga mga construction materials agud mapadasig ang liwat nga pag obra sang mga apektado sang ila balay. Ginpahayag naman ni Talisay City Social Welfare and Development Office (CSWDO) Head Dionela Madron, nagbaton man ang mga ini sang Bugas, Groceries, kag ginalauman ang pila sa mga apektado ang magabalik na sa ila lugar sa maabot nga Domingo bangud pila sa mga ini ang naga-amat amat na tukod sang balay gamit ang mga kagamitan nga ginhatag. Dugang pa, naghatag man si Mayor Lizares sang napulo ka adlaw nga cash for work nga nagasweldo sang P450.00 pesos kada adlaw, para nga maka piyan-piyan sa kinahanglanon sang mga nasunugan.
