Nanagtag sang mga incubator ang Provincial Government sang Negros Occidental agud mabuligan ang mga mangunguma kag mga anay rebelde sa pagpasanyog sang ila palangabuhian nga pagbaligya sang balut.
Ginpahayag ni Governor Bong Lacson nga yara sa isa ka milyon ang demand sa balut sa probinsiya kada bulan apang yara lamang sa 200,000 tubtob 300,000 ang maprodyuser.
Sa sini, nagakinahanglan nga makaprodyuser sang dugang nga kapin 700,000 ka itlog kada bulan agud mahimun-an ang demand sa balut.
Ginpabutyag ni Gov. Lacson nga ginpauntat ang pag-import sang balut gikan sa Luzon bangud sang kakugmat sang paglapta sang bird flu rason sang pagpalab-ot sang bulig sa mga nagaprodyuser sini.
Sa data sang Provincial Veterinary Office, napulo ka mga asosasyon nga ginatapuan sang mga myembro sang grupo nga Kapatiran kag subong man mga mangunguma ang nagbaton sang ayuda sang Capitolio.
Kabug-usan nga P2,000,000 ang balor sang 10 ka incubator, 1,000 heads sang bibi kag 127 ka sako sang feeds ang ginbaton sang mga benepisyaryo.
