Ginkilala bilang Icon of Radio ang Station Manager sang RMN DYHB Bacolod 747 nga si Radyoman Doc Jeony Bigay sa Kalantipan sa Kahanginan: The Broadcast Excellence Awards bilang kabahin sang selebrasyon sang World Radio Day kahapon nga adlaw, Pebrero 13, 2025. Ang Icon of Radio Award ang isa ka prestihiyoso nga pagkilala nga ginahatag sa isa ka personalidad bangud sang iya eksperensya kag ihibalo sa Radio Industry sa sulod sang madamo nga tuig. Lakip diri ang iya dedikasyon kag ang talalupangdon nga mga kontribusyon para mangin talaksan sang standard broadcasting nga nagabilin kag indi mapanas nga marka sa industriya. Si Radyoman Jeony ang ginkilala man bangud sang iya padayun nga empluwensya sa kahanginan nga nagahatag inspirasyon sa karon kag sa palaabuton nga mga henerasyon samtang padayun nga ginadala ang gahum sang radyo bilang isa ka pamaagi para sa pagpalapnag sang impormasyon. kalingawan, kag koneksyon. Personal nga ginbaton ni Radyoman Jeony ang prestihiyoso nga pagkilala gikan sa mga opisyales sang City Government sang Bacolod. Sa pihak nga bahin, ginkilala naman bilang Best Public Service Program ang DYHB Sentro Serbisyo nga nagapalayag sa kahanginan tagsa ka alas-11:30 sang aga tubtob alas-2 sng hapon kada adlaw kun sa diin host diri sanday Radyoman Yves Montecillo kag Radyoman Nikki Magbanua. Madinalag-on man nga ginkilala bilang Best Radio Drama Program ang Mundo Mistiko nga isa sa mga Drama sang DYHB nga nagapalayag sa kahanginan tagsa ka alas-12 sang gab-I tubtob 12:30 sang kaagahon nga ginadumala sang Drama Productions sa pagpanguna ni Gerard Marcellana Andrade. Ang Kalantipan sa Kahanginan – Broadcasting Excellence Award ang kabahin sang selebrasyon sang World Radio Day subong nga tuig sa ciudad sang Bacolod nga nagatuyo hatagan sang pasidungog ang mga personalidad sa likod sang mga tingog nga nagapahibalo, nagahatag inspirasyon, kag nagapabaskog sa komunidad.
