Wala na sang may nagluntad nga ash emission sa Bulkan Kanlaon humalin sang natabo nga minor explosive eruption sadtong Pebrero 6.
Ginpahayag ni Mari-Andylene Quintia, resident volcanologist sang PHIVOLCS Kanlaon Volcano Observatory sa La Carlota City, wala na nagbuga sang abo apang padayon ang degassing nga may upod nga sulphur dioxide.
Paathag ni Quintia, ang degassing, nga makit-an paagi sa puti nga aso nga nagaguwa sa baba sang bulkan, ang nagapatunda sang padayon nga aktibidad sang Kanlaon.
Paathag sini dugang, nagapakita ini nga wala na sang nagasupon sa vent ukon baba sang bulkan.
Samtang, ginklaro naman ni Quintia nga ang nagaguwa nga data nga lima ka kilometros na lamang ang kalayuon sang magma sa crater sang Kanlaon, ang base pa sa data humalin sang phreatic eruption sadtong Hunyo 6, 2024.
Sa karon, wala pa sila sang bag-o nga data angot sa pagsaka sang magma.
