Ginalauman nga magsaka ang presyo sang kuryente sa masunod nga anum ka bulan, ini ginpahayag ni Energy Sourcing Manager sang Negros Power nga si Engineer Christian Villena.
Sa interview sang DYHB kay Villena, ginpahayag sini nga indi lang ang Negros Power ang may increase kundi halos tanan nga mga power supplier sa Luzon, Visayas kag Mindanao.
Paathag sini nga ang pagsaka amo ang tungod sa transmission charge sang National Grid Corporation of the Philippines (NGCP) sa diin ginalauman maglab-ot ini sa 10 tubtob 12 sentimos kada kilowatt-hour.
Paathag ni Villena, wala gid nakapasaka presyo ang Negros Power halin sang pagsugod sini apang, nagakaapektuhan ang electricity rate bangud sang generation kag transmission charges.
Sa karon, ila pa iga-finalize ang rate sa mga masunod nga billing months.
Sini nga Pebrero, posible nga mabatyagan na ang nasambit nga pagsaka sa presyo sang kuryente.
