Ginmandu sang Sandiganbayan ang pagdakup sang anay alkalde sang banwa sang Valladolid, Negros Occidental nga gin-convict sa kaso nga graft apang nagapabilin nga at large. Nag-issue si 7th Division Associate Judge Zaldy Trespeses sang warrant of arrest batuk kay Romel Patalita Yogore sadtong Disiembre 13, 2024 matapus nga nakit-an nga liable nga pagbayolar sang Anti-Graft and Corrupt Practices Act. Ginpahayag ni Negros Occidental Police Provincial Office (NOCPPO) director Colonel Rainerio De Chavez nakaligad nga Huwebes, nga sa karon indi pa ma-locate kon sa diin si Yogore. Pahayag sang opisyal nga ginserbe sang kapulisan ang warrant sadtong Enero 5 apang wala ini sa iya nga puluy-an sa Barangay Poblacion sa Valladolid. Gin-convict sang Sandiganbayan si Yogore may angut sa pagbakal sang municipal government sang construction materials nga nagabalor sang P230,395 sa isa ka construction stroe nga ginapanag-iyahan sang iya brother-in-law nga si Jonie Nieve nga wala naglabay sa public bidding. Ang nasambit nga mga materyales ang para sa rural health unit sadtong 2008. Ginpamatbatan sang antigraft court si Yogore sang walo ka tuig kag isa ka bulan nga pagka-bilanggo tubtub walo ka tuig. Ini siya ang indi naman pwede nga magpadalagan kag mag-obra sa gobyerno. Gin-apelar ni Yogore ang desisyon sa Supreme Court apang gin-deny ini sadtong Marso 3, 2022. Nangin final and executory ang desisyon sang SC sadtong Marso 29, 2024.
