Nagpakig-angot na ang Bago City Disaster Risk Reduction and Management Office sa ila nga City Health Office agud ipaidalom sa laboratory test ang spring water sa Barangay Mailum.
Ginpahayag ni Bago CDRRMO Head Dr. Merijene Ortizo nga ila ginhingyo ang Water Sanitation and Hygiene (WASH) Team nga magpatigayon sang physico-chemical analysis sa open sources sang tubig sa nasambit nga barangay nga nakontaminar sang abo kasunod sang ashfall sang Bulkan Kanlaon tinalikdan nga Sabado.
Nahibaluan nga ang mga pumuluyo sa Sitio Lunao, Sitio Hagdan, Sitio Tabidyaw kag Purok Pili, tanan sa Barangay Mailum, ang nagasalig sang ila ilimnon kag galamiton nga tubig gikan sa tuburan.
Nag-deploy na ang Bago CDRRMO kag Provincial DRRMO sang mga water tanker nga may filtration system agud madul-ungan sang tubig-ilimnon sa apektado nga mga pumuluyo.
Naapektuhan sang ashfall kag sulphuric odor gikan sa bulkan ang kabug-usan nga 9,827 nga populasyon sang Barangay Mailum. Nanagtag na man sang N95 mask ang ciudad sa mga pumuluyo.
