Patigayunon sini nga semana ang ceremonial turnover sang mga bahay kubo sa gin-stablisar nga temporary shelter sa Barangay Napoles, Bago City para sa mga naapektuhan sang paglupok sang Bulkan Kanlaon.
Ginpahayag ni Bago City DRRMO Head Dr. Merijene Ortizo nga kabug-usan nga 50 ka mga kubo ang ginpahamtang sa lugar kag prayoridad nga mahatagan sini ang 24 ka pamilya ukon 51 ka mga indibidwal gikan sa 6-kilometer extended danger zone sang Kanlaon nga yara sa karon sa evacuation center.
Ang nabilin nga mga kubo ang ginatigana pananglitan maglupok ang bulkan kag magdamu ang evacuees.
Suno kay Dr. Ortizo, ceremonial pa lamang ini bangud ginatapos pa ang communal toilet kag community kitchen sa temporary shelter.
Magluwas sa mga evacuees, may mga kubo man para sa security personnel, medical team kag camp management team nga lunsay naga-asister sa mga internally-displaced persons (IDPs).
Pabugal ni Ortizo, tuman ka strategic sang area bangud magluwas nga indi ini malab-ot sang lahar flow, malapit man ini sa demo farm sang City Agriculture Office kun sa diin may programa na nga ginplastar ang city government para sa palangabuhian sang mga evacuees.
Nahibaluan nga ang temporary shelter ang ginpahamtang sa propyedad sang city government nga malapit man sa temporary quarantine facility, nga sarang man mag-akomodar kun magdamo pa ang evacuees, kag subong man sa Balay Silangan.
