Madinalag-on nga nadakop sang mga katapo sang San Carlos City Police Station and duha ka mga suspetsado nga gina-alegar nagluthang sa isa ka katapo sang Army sa Sitio Takas, Brgy. Palampas, San Carlos City, Negros Occidental alas-12:10 sang udto, Pebrero 17, 2025. Ginkilala ang biktima nga si Alfort Tito, 40-anyos, miembro sang 79th Infantry Batallion sang Philippine Army kag residente sang Barangay Bato, Sagay City samtang ang duha ka suspetsado ang ginkilala naman sanday Jobert Gimarangan, 31-anyos kag Alfie Raganas, 42-anyos, pareho nga residente sang banwa sang Calatrava. Sa interview sang DYHB kay Civil Military Coordination Officer 79th IB, 1Lt. Carlo Samoza ginpahayag sini gilayon nga gindala sa San Carlos City Hospital ang biktima para sa nagakaigo nga pagbulong kag karon, yara na sa estable nga kondisyon. Suno kay Samoza, nagpadulong sa ciudad sang San Carlos ang biktima nga tuyo kuntani mag bakal sang iya sini maintenance medicine gamit ang iya motor apang hinali ini nga ginluthang sang duwa ka mga sustpetsado kag madasig nga nagpalagyo. Gilayon naman nga nagpatigayon sang hot pursuit operation ang kapulisan kun sa diin natigayon nga nadakop si Gimarangan kag Raganas kag nakuhaan sang 162.67 grams sang suspected shabu nga nagablor sang P1,106,156. Narekober man gikan sa mga ini ang 2.47 grams sang suspected marijuana, tatlo ka empty shells sang .45 Caliber nga armas, 24 ka .45 Caliber live ammunitions, isa ka granada, kag pila pa ka mga non-drug items. Ginalantaw naman nga personal nga kaakig ang motibo sang pagpangluthang sa biktima apang suno kay Lt. Samoza nga posible mistaken identity ang natabo. Padayun naman ang imbestigasyon sang San Carlos City Police Station natuhoy sa nasambit nga insidente.
