BACOLOD CITY- Narekober ang ₱2,516,000 nga balor sang ginapatihan shabu sa ciudad sang Bacolod pinaagi sa duha ka nagkalain-lain nga drug buybust operation sang City Drug Enforcement Unit.
Una nga ginpatigayon ang drug buy bust operation sa Purok Lubi Barangay 3, pasado las-10 sang gab-i, Pebrero 17 kun sa diin natigayon naaresto si Jason Alit, 30-anyos; Charles Deber, 29-anyos; Johnrey Guion, 30-anyos; kag sila ang nakuhaan sang ₱1,020,000 sang balor sang ginapatihan shabu.
Samtang sang Pebrero 18, natigayon nga makuha kay Kenneth Jacosalem sang Purok Gonzaga Extension, Barangay Taculing ang ₱1,496,000 nga balor sang illegal nga droga.
Ginpahayag ni Police Lieutenant Colonel Antonio Benitez Jr. head sang CDEU, natigayon ang drug buy bust operation bangod sa mga report sang komunidad batok sa amo nga mga personalidad.
Nahibaluan nga ginadeliver sa mga suspetsado nga nadakpan sa Brgy. Taculing ang suplay sang illegal nga droga samtang sa Brgy. 3 ang ginadeliver pinaagi sa pagdul-ong sa parcel, kag ini ang nagikan sa nagkalain-lain nga mga supplier.
Padayon ang monitoring sang CDEU natuhoy sa mga tawo ukon grupo nga imbolbado sa illegal drugs kaupod ang Philippine Drug Enforcement Agency.
Natalana nga ifile na ang kaso batok sa mga suspetsado sa paglapas sa Republic Act 9165 ukon Comprehensive of Dangerous Drugs Act of 2002.