Isa ka dako nga pagpanghangkat para sa 3rd Infantry Division, Philippine Army ang i-sustiner ang mga una na gindeklarar nga “insurgency free” barangays sa Negros Occidental kag Oriental.
Sa interview sang DYHB kay 3ID spokesperson LtCol. J-jay Javines, ginpahayag sini nga ila gid ginatinguhaan nga indi na liwat pa ma-recover sang mga remnants sang New People’s Army (NPA) ang mga lugar nga ila na napang-clear halin sa ano man nga aktibidad sang mga rebelde.
Dugang pa sini nga dako gid ang nabulig kag mabulig sang Local Government Unit (LGU) kag Philippine National Police (PNP) sa pagpasiguro sang kahilwayan sang tagsa ka mga barangay kag sitio.
Suno kay LtCol. Javines, wala naman sang active guerrilla front diri sa Negros bangud tinalikdan nga tuig pa nadeklarar sang army nga stable na ang internal peace and security sa isla.
Apisar may presensya pa sang mga remnants ukon squad-size nga grupo sang NPA, apang suno kay Javines yara nalang ini sa walo tubtob siyam ka bilog.
Para kay Javines, dako gid ang nangin role sang National Task Force to End Local Communist and Armend Conflict (NTF-ELCAC) sa pagsabat sang social economic issues labi na sa mga lugar nga tuman nga na-impluwensyahan sang mga rebelde.
Panawagan sang 3ID sa mga remnants karon nga magpanaog na kag mag-upod sa programa sang gobyerno agud wala na sang may mahalitan pa sa mga matabo nga engkwentro.
