Gina-alegar kakulangan sa training sang midwife kag equipment sang Bago City Hospital ang pila sa mga possible kag ginalantaw gintunaan sang kamatayon sang bag-ong bun-ag nga lapsag sang tinalikdan nga Pebrero 18, 2025.
Base sa ginpahayag sang iloy sang lapsag, tuyo kuntani sini magbata sa Valladolid District Hospital apang ginsilingan ini sang City Health Office nga sa Bago City Hospital, amo nga nagdesisyon ang mag-asawa nga sa amo nga ospital na lang ini magbata bangod naglupok na ang panubigan sini.
Apang base sa panaysayon sang iloy, kapin 12 ka oras ini nag pasakit sa ospital kag nagsiling na sa mga midwife nga magpa cesarian na lang bangod indi na niya makaya ang normal delivery bangod tuman kadako sang bata, apang gina-alegar ginpilit sang midwife nga mapagwa ang bata.
Suno sa ospital, nakakaon sang higko ang lapsag nga gintunaan sang kamatayon.
Santo naman sa panaysayon sang amay, wala ini ginsilingan natuhoy sa sitwasyon sang iya asawa nga nagaisahanon sa labor room, ginpahanugutan na lamang ini nga makasulod sang gina-revive na ang lapsag kag ini ang may sanction na.
Nabatian pa sang amay nga ginsilingan pa sang isa ka doktor ang midwife nga nagatahi sa iya nga asawa nga “sala mana imo pangtahi”, rason nga liwat gintahian.
Nagapanawagan ang ginikanan sang lapsag nga mahatagan sang hustisya ang kamatayon sang ila nga bata.
