Ginbaha ang duha ka mga Barangay sa ciudad sang San Carlos kahapon sang kaagahon, Pebrero 23,2025 matapos nagbubo ang makusog nga pag-ulan.
Apektado sang pagbaha ang Barangay 1 kag Barangay 5 sa nasambit nga ciudad sa diin nag awas gid ang mga creek nahamtang malapit sa lugar.
Sa kabug-usan, kapin 73 ka mga panimalay sa duha ka mga barangay ang apektado sa nasambit nga pagbaha.
Suno sa San Carlos City Disaster Risk Reduction Management Office (DRRMO) pasado las-5 sang aga kahapon sang hinali lang nag-overflow ang Palampas River sa bahin sang Barangay 1.
Base sa nangin weather forecast sang PAG-ASA, moderate to heavy rains nga magalawig sang tubtob duha ka oras ang posible mag igo sa ciudad sang San Carlos sadto nga mga tinion.
Base sa panaysayon sang pila ka mga residente, pasado las-2 sang kaagahon sang nagbubo ang makusog nga pag-ulan sa nabukid nga bahin sang San Carlos.
Bangud nga high tide man sadto nga tinion, madasig man nga nagsaka ang tubig sa isa ka coastal area sa Barangay 1, rason nga kapin 45 ka mga panimalay ang nalubog sa tubig.
Sa pihak nga bahin, kapin 28 ka mga panimalay naman sa Barangay 5 ang ginbaha sang nag-awas ang isa ka creek.
Base sa rekord sang DRRMO, isa naman ka balay ang naguba matapos nagluntad ang isa ka landslide sa Sitio Camandangan,San Carlos City.
Apisar may mga pamilya nga nag-evacuate, gilayon man ang mga ini ginpapuli matapos nga nag-subside na ang tubig.
Wala naman sang may nasamaran sa natabo nga pagbaha kag landslide sa San Carlos.
Kahapon lang man sang gin-repair sang City Waterworks Department ang Medina Water Treatment Facility agud mabalik na ang supply sang tubig sa pila ka mga apektado nga mga lugar.
