Nagnubo ang narekord nga volcanic earthquakes sang Philippine Institute of Volcanology and Seismology (PHIVOLCS) sa Bulkan Kanlaon humalin Pebrero 23 tubtob las-12 sang kaagahon sang Pebrero 24, 2025.
Yara lang sa tatlo ang nabalhag sang Phivolcs nga pagtay-og sa bulkan kahapon, mas manubo sang sa narekord nga 33 volcanic earthquakes sang tinalikdan nga adlaw.
Halos ka tunga man ang ginbuga nga sulfur dioxide sang bulkan kun ikumpara tinalikdan nga adlaw sa diin humalin sa 3, 894 tonnes a day nangin 1,993 na lamang ini.
Wala naman nahibaluan kung ano kataason sang plume nga nagwa sa baba sang bulkan kag ang direksyon sini tungod natakpan ini sang panganod.
Nagapadayon naman ang ground deformation sang bulkan sa ini nga mga tinion.
Sa karon, padayon nga ginadumilian ang pagpalupad sang ano man nga sahi sang aircraft malapit sa baba sang bulkan.
Ginaabisuhan ang tanan nga may posibilidad sa gihapon sang gulpi nga paglupok sang bulkan, pag-ilig sang lava, pag-ulam sang abo, Pyroclastic Density Current (PDC), rockfall kag pagbaha sang lahar kun may mabaskog nga pag-ulan.
Nagpabilin sa gihapon sa alert level 3 ang Mt. Kanlaon.
