Nawasak ang Medina Water Treatment Facility, isa ka mayor nga source sang tubig sa ciudad sang Carlos, bangud sang tubig-baha kasunod sang mabaskog nga ulan kahapon.
Ginpahayag ni Mayor Renato Gustilo nga naguba ang intake water sang pasilidad rason nga nadulaan sang suplay sang tubig ang pila ka mga subdivision sa lugar.
Base sa pag-assess sang mga engineer, magalawig sang kutob sa isa ka semana antes makay-o ang water treatment facility apang ila tinguhaan nga ma-restore ini sa sulod sang tatlo ukon apat ka adlaw.
Ginklaro naman ni Mayor Gustilo nga separado nga pasilidad ang ginakuhaan sang suplay sang tubig sang city proper.
Sa separado nga interview, ginpahayag ni San Carlos CDRRMO Head Joe Recalex Alingasa nga malapit 4,000 ka mga konsumidor ukon 38 tubtob 40 percent gikan sa kabug-usan nga 10,500 ka mga konsumidor nga gina-suplayan sang Medina Water Treatment Facility ang naga-eksperyensiya sang “low pressure to no water”.
Sa karon, may gin-deploy nga mga water tanker gikan sa City Disaster Risk Reduction and Management Office kag Bureau of Fire Protection agud mag-rasyon sang tubig sa apektado nga mga pumuluyo.
