Ginhambalan sa pagsinapol sang local nga opisyales upod si President Bongbong Marcos tinalikdan nga Byernes ang short-term kag long-term solutions para sa mga apektado sang pag-alburuto sang Bulkan Kanlaon.
Ginpahayag ni Governor Bong Lacson nga ginpalab-ot sang mga alkalde kay President Marcos nga nagapanguna nila nga kabudlayan amo ang pundo bangud sang padayon nga pagsabat sa mga kinahanglanon sang apektado nga mga pumuluyo.
Ginhingyo ni La Carlota City Mayor Rex Jalando-on nga gamiton sini ang 20% development fund apang wala ini ginatugutan bangud para sa imprastraktura ang amo nga pundo.
Samtang, si Canlaon City Mayor Batchok Cardenas ang naghingyo naman sang bulanan nga paghatag sang ayuda kaangay sang Assistance to Individuals in Crisis Situation (AICS) sa mga evacuees.
Sa sini, suno kay Gov. Lacson, ginsuhestyon ni President BBM ang paghatag sang dugang nga quick response fund (QRF) sang mga LGUs kag subong man ang pagpabakod sang Task Force Kanlaon.
