Indi na pagpasakaan sang kaso ang suspetsado nga nagbuno sa kaugalingon nga lola sa SP Village, Barangay Pahanocoy sa ciudad sang Bacolod, sang tinalikdan nga Pebrero 23, 2025.
Madumduman ang biktima ang ginkilala nga si Erna Araiz, 66-anyos; samtang ang suspetsado amo si Jerian Araiz, 19-anyos, nga pareho residente sa amo nga lugar.
Ginpahayag ni Police Captain Greeky Cayao, Station Commander sang Bacolod City Police Station 8, ang utod sang iloy sang suspetsado ang nagdesisyon nga indi na pagpasakaan sang kaso si Jerian.
Base sa imbestigasyon sang PS8, nangakig ang suspetsado bangod naglalisay ang iloy kag lola sini, rason nga ini ang nagkuha sang kutsilyo kag hinali ginbuno sang makapila ka beses si Erna.
Ginhingagaw dala sa ospital ang biktima, apang gindeklarar ini nga dead on arrival bangod sa pilas nga naagom sa dughan kag panga tuga sang pagpamuno.
Una na nga gina-alegar, may deperensiya sa paminsaron ang suspetsado.
