Ginlunsar sang DYHB 747 kag 94.3 IFM ang Kilalahon Serye 2025 sa programa nga Straight to the Point 2 kaina, Pebrero 26,2025 sa diin tuyo sang estasyon nga mahatagan sang oportunidad ang mga magakandidato sa 2025 midterm elections agud makilala sila sang mga botante diri sa ciudad sang Bacolod.
Ini ang sequel sang aton una na ginpatigayon nga debate serye 2022. Sa ini nga tuig, tuyo sang Radio Mindanao Network (RMN) nga mag-focus sa voters’ education initative.
Imbes nga mag sinumpakilay ang mga kandidato sa isa ka posisyon, diri sa Kilalahon Serye, sila ang pagahatagan sang kahigayunan nga ipresentar ang ila kaugalingon— kun ngaa takos sila nga pilion sang mga Bacolodnon.
Kaupod sang DYHB ang mga external pannelist halin sa Philippine Society for Public Administration (PSPA) halin sa University of St. La Salle, Carlos Hilado Memorial State University, University of Negros Occidental Recoletos, STI- West Negros University, La Consolacion College, Collegio San Agustin-Bacolod kag Riverside College.
Sila amo ang maga pamangkot sa mga kandidato sang ila mga panindugan sa pila ka mga issues.
Pagapangunahan sang mismo Station Manager sang DYHB nga si Dr. Jeony Bigay ang Kilalahon ka serye siya ang magahaboy sang pamangkot kag issues nga aton natipon halin sa mga residente sang Bacolod.
Mangin production director naman sa ini nga event amo ang Station Manager sang 94.3 iFM nga si sir Serafin Plotria.
Pila sa mga rounds sa Kilalahon Serye amo ang: Ano kag sin-o ako bilang kandidato kag Palabra De Honor; Round table Discussion; Kon ako Pahambalon; kag diretsuhanay/ prangkahanay with Radyoman Jeony Bigay. Pinaka-ulihi diri amo ang pagsabat sang mga kandidato sa pamangkot nga “NGAA IKAW?”
Magasugod sa una nga semana ang mga kandidato sa pagka-alkalde, sundan ini sang mga nagakandidato sa pagka-congressman sa lone district of Bacolod kag ulihi amo ang magapapili bilang bise-alkalde kaupod ang tagsa nila ka mga konsehales.
Tinutuyo sang Kilalahon Serye sang DYHB kag IFM nga mismo ang mga botante ang maghusga sa kun paano ipresentar kag panindugan sang mga kandidato ang ila sini ginapadalaganan nga posisyon pananglit sila ang mahatagan sang kahigayunan.
