Ginakondenar ni Murcia Municipal Mayor Gerry Roxas ang kapintas nga buhat nga ginhimo sang wala pa makilal-an nga suspetsado sa isa ka Ido sa bahin sang Hda. Puyas, Barangay Blumentritt, banwa sang Murcia kahapon, Pebrero 24, 2025.
Nahibaluan nga ang makalulu-oy nga Ido ang gintiro sang Indian Target sang makalima ka beses sa nagkalain-lain nga bahin sang iya lawas nga gintunaan sang pagkapilas sini.
Gilayon naman nga gin-rescue ang Ido nga ginhingalanan kay Tiktok sang mga katapo sang BACH Project PH nga isa ka organisasyon nga naga-rescue sang mga kasapatan.
Sandig naman sa facebook sang BACH Project PH, nagpanawagan ini sang manugdonar sang dugo para kay Tiktok matapos ang insidente kag maswerte naman nga nakapangita ang mga ini sang blood donor pinaagi sa isa ka doktor.
Suno kay Mayor Rojas, ang ginhimo sa Ido ang isa ka “act abject cruelty kag cowardice” batok sa inosente nga sapat.
Pahayag pa sang alkalde nga ang “barbaric behavior” sang suspetsado ang “unacceptable” kag wala nagapakita sang matuod nga mga kabilinggan sang mga Murciahanon.
Nagatanyag karon ang alkalde sang P10,000 nga balor sang reward sa kun sin-o man ang makatudlo sa suspek nga naghimo sang mapintas nga buhat.
Nagpalab-ot man si Mayor Rojas sang iya pagpasalamat sa mga katapo sang BACH Project PH sa ila madasig kag komitido nga pagrescue sa biktima nga Ido.
