Nagakabalaka na ang mga fisherfolk association sang Cadiz City angut sa nangin ruling sang korte suprema nga nagadula sang 15-kilometer municipal waters demarcation amo kun ngaa ila na ginpalab-ot sa ciudad ang ila nga concern.
Sa interview sang DYHB kay Cadiz City Mayor Salvador “Bading” Escalante, ginpahayag sini nga katunga sang mga barangay sa ila ciudad ang nahamtang malapit sa baybayon sa diin may yara sang kapin 4,500 ka mga mananagat ang nagasalig sa pagpangisda.
Suno kay Mayor Bading, nag-ubra na sang resolution ang mga fisherfolk association sa ciudad sa diin ila ginahingyo ang Sangguniang Panlungsod sang Cadiz kag Sangguniang Panlalawigan sang Probinsya sng Negros Occidental nga mag-appeal sa Supreme Court.
Dugang pa sang alkalde, aware man ang mga commercial fishing vessel kun ano ang posible matabo sa mga gagmay nga manugpangisda tion nga sudlon sang mga ini ang 15-kilometer municipal waters.
Mga 45,000 ka mga mangingisda sa Negros Occidental, mangin apektado sa tion nga sudlon sang commercial fishing ang 15km demarcation sa municipal waters.
Dugang pa sini nga sa isa lang ka fishing operation, sarang makakuha sang 100,000 tons sang isda ang dalagkuan nga commecial fishing vessel
Amo kun ngaa, tani indi nalang nalang nila pag-intrahan ang gagmay nga mga mananagat sang ciudad.
Nahibaluan nga importante ang 15-kilometer municipal waters sa palangabuhian sang kapin 45,000 ka mga mananagat nga katapo sang 472 ka mga fisherfolk associations sa 187 ka mga barangay nga sakop sang 24 ka mga LGUs diri sa Negros Occidental
Madumduman nga una na ginpahayag ni Governor Eugenio Jose “Bong” Lacson nga iya na ginatugyan sa National Government ang pag-apelar sang nasambit nga SC ruling.
