Ginakabig sang Bureau of fire Protection-Bacolod City nga epektibo ang ila pagsulod sa mga barangay diri sa ciudad agud ikampanya ang fire prevention.
Sa interview sang DYHB kay Bacolod Fire Marshall FSpt. Jenny Mae Masip, ginpahayag sini nga kalabanan sang ila narespondehan nga sunog, fire out na kun maabtan nila.
Ila man na apresyar ang pagtawag sa ila sang mga pumuluyo apisar gamay pa lang ang kalayo. Suno kay FSpt. Masip, ila gid ginapa-intyende sa mga tawo nga indi na paghulton pa magdako ang kalayo antis magpabalo sa ila.
Ginsiguro man sang BFP nga hapos sila malab-ot sang mga nagapangayo bulig bangud nagpangtapik man sila sang “BFP hotline numbers” sa kada barangay ilabi na sa mga red zone areas.
Nahibaluan nga may yara sang 284 ka na-identify nga red zone barangays ang BFP diri sa ciudad sang Bacolod. Ginabug-usan ini sang 2,238 ka mga panimalay nga ubra sa light materials.
Makabig nga red zone area ang isa ka lugar kun nagatinapik lang ang mga puluy-an kag kun kitid ang alagyan sa diin mabudlayan maka-penetrate ang BFP sa pagpalong sang kalayo.
Dugang pa ni Masip mga mas nubo ang ila marespondehan nga sunog sini nga tuig kun ipaanggid sa ila narespondehan sang 2024 sa pareho nga bulan.
Sini nga Marso magaselebrar ang BFP sang Fire Prevention Month.
