Ginbawian sang kabuhi ang isa ka motor rider matapos maaksidente pasado las-12 sang tungang udto, adlaw sang Domingo, Marso 2, 2025 sa Proper Barangay Dulao sa ciudad sang Bago. Ang biktima ang ginkilala si Juan Lansangan Jr., legal ang edad, kag residente sang Purok Paho sa amo nga barangay. Base sa ginpahayag ni Susan Jagocoy, residente sa lugar, sila ang nakabati sang paglagabok nagikan sa dalan kag didto ila nakita nga yara na sa kalog si Lansangan kag natunga na sa duha ang motorsiklo nga ginamaneho. Nahibaluan nga nagikan sa ila puluy-an si Lansangan kag magapatughong kuntani agod magtabo sa iya nga abyan. Gina-alegar madasig ang pagpadalagan sang biktima sang iya nga motorsiklo kag aksidente nga nakabunggo sa bato rason nga ini ang na overshoot. Ginkompirmar sang Bago City Police Station nga gindeklarar nga dead on arrival sa ospital ang biktima. Antes pa man ang aksidente sa Bago City, isa man ka lalaki ang ginbawian kabuhi matapus nga maaksidente sa dalanon sa Sitio Sawangan 2, Barangay Libacao, ciudad sang Himamaylan, Sabado sang gab-i, Marso 1. Ginkilala ang napatay sa kay alyas Christian, 19, residente sang Barangay Cabadiangan sang amo nga ciudad samtang angkas sini sanday alyas Michelle, 18 kag isa ka 17 anyos nga babaye. Sakay naman sang tricycle sanday alyas Gene, 22 kag pito ka tuig nga bata nga lalaki nga pumuluyo naman sang banwa sang Binalbagan. Sandig sa imbestigasyon sang Himamaylan City Police Station, padulong sa proper ang motorsiklo nga ginamaneho sang biktima samtang yara naman sa higad sang dalan ang tricycle nga ginatulod sang driver. Hinali na lang nga nabungguan sang motor ang tricycle rason nga nahulog ini sa higad sang dalan samtang nagtabog naman ang sakay sang motor. Gindala pa sa ospital si Christian apang wala ini matabangan.
