Natalana nga magasalang si Incumbent Councilor Kalaw Puentevella bilang Vice Mayoralty Aspirant sang ciudad sa patigayunon nga RMN Kilalahon Serye sang DYHB 747 kag 94.3 iFM Bacolod sa Central Hall sang Bacolod Ayala Mall, alas-2 sang hapon, bwas nga adlaw, Marso 19, 2025.
Mangin kaupod ni Puentevella ang 12 ka mga nagapapili konsehal sa idalum sang Team Asenso nanday, Incumbent Councilor Em Ang, Al Victor Espino, Celia Flor, Vladi Gonzales, Israel Salanga, Jason Villarosa, Pao Sy kag Thaddy Sayson,
Dugang pa diri nanday Homer Bais, Bobby Rojas, Dindo Ramos kag ang Punong Barangay sang Singcang Airport kag anay Councilor Ceasar Distrito.
Ini na ang ika-lima nga episode sang Kilalahon serye kun sa diin una na nga nagsalang diri ang duha ka mga nagapapili bilang alkalde sanday Incumbent Vice Mayor El cid Familiaran kag Bacolod Lone District Congressman Greg Gasataya kag ang duha ka nagapapili bilang Congressman sanday Incumbent Mayor Albee Benitez kag Former Mayor Evelio ‘Bing’ Leonardia.
Mangin kaundan sang bug-os nga programa ang apat ka segments nga ginalakipan sang ‘Sin-o kag Ano Ako’; ‘Palabra de Honor’; ‘Round Table Discussion’; ‘Derechohanay kag Prangkahanay with Radyoman Jeony Bigay’ kag ang ‘Nga-a ikaw’ nga nagasentro sa pagkilala sang kandidato.
Tinutuyo sang Radio Mindanao Network (RMN) Kilalahon Serye nga mag-focus sa voter’s education initiative nga sa baylo magsinumpakilay ang mga kandidatu sa isa ka posisyon, sa Kilalahon Serye, sila ang mahatagan sang kahigayunan nga ipresentar ang ila kaugalingon, kon ngaa takos sila nga pilion sang mga Bacolodnon.
Pagapangunahan sang mismo Station Manager sang DYHB nga si Dr. Jeony Bigay ang Kilalahon Serye nga amo ang magahaboy sang pamangkot kag issues nga natipon halin sa mga residente sang Bacolod. Kaupod man sa serye sa pagpamangkot sa mga kandidatu sang ila panindugan sa mga issues ang mga external panelist gikan sa Philippine Society for Public Administration (PSPA) halin sa University of St. La Salle, Carlos Hilado Memorial State University, University of Negros Occidental Recoletos, STI- West Negros University, La Consolacion College, Collegio San Agustin-Bacolod kag Riverside College.
Mangin production director naman sa ini nga event amo ang Station Manager sang 94.3 iFM nga si sir Serafin Plotria kaupod ang bilog nga pwersa sang RMN Bacolod.
