Ginkilala ang Carlos Hilado Memorial State University (CHMSU) Binalbagan bilang kampeon sa nahauna nga Governor Bong Lacson Stage Radio Drama Competition nga gin-organisar sang Radio Mindanao Network (RMN) DYHB Bacolod Drama Center bilang kabahin sa selebrasyon sang Panaad sa Negros Festival nga ginpatigayon sa Panaad Park, Bacolod City kagab-I, Marso 25, 2025.
Ginsundan ini sang Philippine Normal University (PNU) bilang 1st runner up kag Bago City College bilang 2nd runner up.
Samtang consolation prize naman ang nakuha sang Carlos Hilado Memorial State University Alijis; State University of Northern Negros (SUNN) kag Bacolod City College.
Sa bahin naman sang special awards, madinalag-on nga nakuha sang SUNN ang Best Sound Design samtang Best Script ang PNU kag Best Props ang Bago City College.
Dugang pa, nakuha man sang CHMSU Binalbagan ang Best Musical Scoring kag lunsay mga taga-CHMSU Binalbagan ang ginkilala bilang Best Female kag Male Actor nga sanday Limalyn Dela Cruz kag Zhandrison Germinal.
Antis pa man nagtakop ang programa, nagpresentar man ang mga katapo sang RMN DYHB Drama Production sang isa ka drama nga ginapalayag sa radyo sa pagpanguna ni Gerard Andrade nga nagaserbe bilang Drama Production Manager.
Yara man sa kahiwatan si Serafin Plotria Jr. sang 94.3 iFM; Ronel Sorbito sang DYRI RMN Iloilo kag Doc Jeony Bigay sang DYHB nga lunsay mga nagserbe bilang mga hurado.
Nahibaluan nga ini ang pinakauna nga pagpatigayon sang kompetisyon nga tinutuyo diskubrihon ang mga talento sang mga estudyante gikan sa nagkalain-lain nga eskwelahan kag mangin kabahin sa padayun nga pagpasanyog sang radio drama sa probinsya sang Negros Occidental.
