Nangin “largely peaceful” kag wala sang dalagku nga security incidents nga nagluntad sa isa ka semana nga paghiwat sang 29th Panaad sa Negros Festival.
Ini ang base sa After Security Coverage Report sang Task Group Panaad sa Negros 2025 nga ginapamunuan ni Negros Occidental Police Provincial Office Director PCol Rainerio De Chavez.
Base sa report, ang pangkabug-usan nga kadalag-an sang kahiwatan ang bangud sang epektibo nga deployment sang security personnel, coordinated efforts sa tunga sang law enforcement agencies kag ang pagka-proactive sang emergency response teams.
Ang 29th Panaad sa Negros Festival, nga ginhiwat sadtong Marso 24 tubtob 30, ang ginbantayan sang 1,063 ka mga security kag emergency preparedness personnel gamit ang 17 ka patrols, isa ka truck, 20 ka mga motorsiklo, apat ka fire trucks, isa ka rescue truck, 10 ka mga ambulansiya, 100 ka handheld radios, duha ka base radio kag duha ka megaphones.
Ginabanta nagdangat sa 73,462 ang mga nagbisita sa kahiwatan.
Angot sini, ginpasalamatan ni Governor Bong Lacson ang mga katapo sang PNP, Army, BFP kag Coast Guard sa pagbantay sang peace and order sang Panaad Festival.
Lunes sang aga, ginpangunahan ni Governor Lacson ang deactivation sang Task Group Panaad.
