Nakabalhag sang pagnubo ang kita ukon income sang 29th Panaad sa Negros Festival kun ikumparar sang nagligad nga tuig.
Sa ginpaguwa nga sales report sang Capitolio, as of 7:00pm sang March 30, yara sa P14,943,266.70 ang nangin income sang Panaad Festival kun sa diin ang pinakadaku ang gikan sa mga LGU pavilions nga yara sa P9,133,412.50.
Ginalantaw naman nga magasaka pa ini sang dugang nga kita kagab-i.
Sadtong 2024, yara sa P19.2 million ang nangin kita sang Panaad Festival, nga mas manubo naman sang 20 percent ikumparar sadtong 2023 nga yara naman sa P23.6 million.
Una na nga gin-aku ni Governor Bong Lacson nga nangin mabudlay ang pagganyat sang publiko nga maglagaw sa 29th Panaad sa Negros Festival bangud nga may klase pa.
Nahibaluan nga kinaandan nga sa bulan sang Abril ginahiwat ang ginabansagan nga “mother of all festivals in Negros Occidental” kun sa diin bakasyones na sang mga estudyante.
