Nagapati si Bacolod City Mayor Albee Benitez nga dako ang mangin kontribusyon sang mga pumuluyo sang Bacolod para nga mahagan hagan ang epekto sang climate change sa kalibutan.
Suno kay Benitez, kinahanglan sang ciudad sang “warriors” nga mangin aktibo sa pagpartisipar para mag-institutionalize sang aktibidad kag pagbag-o para sa dunang manggad.
Nadiskubrehan naman sang ciudad nga ang ginahalinan sang pagbaha sang nagligad nga tuig amo ang pagtaas sang lebel sang tubig sa bilog nga kalibutan nga kun diin dako sagihapon ang epekto sini sa mga pungsod apisar milliliters lamang ang gintaas sini.
Ginsambit naman nga halimbawa ni Benitez ang pagbaha sa pungsod sang China, New York, kag sa disyerto sa Middle East nga kun diin amo na ini ang ebidensya nga ang climate change ginaapektuhan na ang dunang manggad.
Ginpahayag ni Benitez nga ang isa sa mga paagi sang ciudad para makabulig nga mahagan hagan ang climate change amo ang paglunsar sang programa nga gina-convert ang mga public utility transportation sa electric vehicles.
Ang ciudad may pila ka electric jeep nga kun diin naglunsar man ini sang green route nga ekslusibo lamang sa mga e-jeep vehicles.
Nagapati man si Benitez nga madamo pa ang pwede maobra para mahagan hagan ang climate change kag madamo dapat nga mga tawo ang aktibo nga magpartisipar indi lamang sa pagpromote sang awareness kundi para mag-obra sang tikang nga makabuhin sa epekto sang climate change.
Nagalaum si Benitez nga madamo ang mahingyo para mabatuan ang climate change.
Ginasigurado ni Benitez nga bukas ang Bacolod LGU nga maghatag sang bisan ano nga bulig sa mga gaobra sang tikang para sa ikaayo sang dunang manggad.
Ginahingyo naman ni Benitez ang mga residente sang Bacolod nga magsugid sa LGU kun may mabal-an ang mga ini nga makadugang sa climate change ilabi na gid kun kinahanglan nga hatagan sang aksyon bangud indi lamang ini responsibilidad sang gobyerno kundi sang tanan.
