Sin-o ang magalaum nga mabag-o gali sang social media ang simple nga pagpangabuhi sang isa ka thai street sweeper? Isa ka Russian nga photographer sa Bangkok ang nakasiplat sa isa ka batan-on nga babayi nga street sweeper sa diin ginkuhaan niya ini sang picture kag video. Ini ang nangin liyabe sa gilayon nga pagsikat sang babayi sa diin madamo ang nagkuha sa iya sa modelling gigs upod sa mga kilala nga brands. Kaangay sang pelikula ang kabuhi ni Noppajit “Meen” Somboonsate, 28-anyos nga single mother sang duha ka kabataan. Sang nakita siya sang kilala nga Russian photographer nga si Semyon Rezchikov nakitaan siya sini sang potential nga mangin isa ka model. Si Meen, nga nagaobra bilang street sweeper, ang wala gani sang ideya nga ginkuhaan siya gali sang litrato ni Rezchikov halin sa malayo bangud nagahanga ini sa iya natural nga katahum. Ginpalapitan siya sang photographer kag ginpakita sini ang litrato kag ginhambalan kun ano siya katahum. Gin-film ni Rezchikov ang ila pagkitaay kag ginpost ini sa iya TikTok account sa diin madasig ini nga nag-viral. Inadlaw lang ang nakaligad, wala-tuo na ang iya engagements sa mga media outlets, nagaamat-amat naman damo ang nga modeling agencies nga nagakuha sa iya. Tungod sang iya pagka-viral, gin-imbitar siya sang bantog nga Thai make-up artist nga si Chatchai Peanfapichart, ukon mas kilala bilang Nong Chat, para sa libre nga makeover session. Ginpursigi ni Meen ang modelling upod sa Browit cosmetics brand ni Nong Chat, kag ginpalapitan pa siya sang iban nga mga brands kag marketing agencies para sa mga kolaborasyon. Kag sang sini lang, iya gin-anunsyo nga magabiya na siya sa iya trabaho bilang street sweeper agud mag-focus sa iya bag-o nga karera. Ang istorya sini ang ginakabig sang iban nga “from rags to riches.”
