Nangin host ang Technological University of the Philippines- Visayas sa ginapatigayon nga Technology Convention 2025 sa sulod sang duha ka adlaw, nga nagsugod subong nga adlaw, Abril 7 kag Abril 8, 2025 sa Ayala Mall Capitol Central.
Nangin tema sa amo nga convention ang “KARI NA sa Technology Convention 2025! Kindling Advanced Research and Innovation for the Next-Gen Arena, ” kun sa diin tuyo sini nga mapasanyog ang research kag innovation para sa mas sustainable nga bwas damlag.
Gintambongan sanday TUP President Dr. Reynaldo Ramos, Department of Science and Technology (DOST) NIR kag VI Regional Director Engr. Rowen R. Gelonga, kag iban pa ang amo nga convention.
Ginpahayag ni Dr. Eric A. Malo-oy, TUPV Campus Director, ini ang nauna nga kahigayunan nga ginselebrar ang convention sa gwa sang eskwelahan bangod tuyo sini nga malab-ot ang mas madamo nga tumalan-aw, maka-engganyo sang dugang nga collaborators, industry partners, kag mga miyembro sang komyunidad.
Samtang, ginpahayag naman ni Engr. Gregorio Crisostomo nga luyag nila madala ang tanan nga stakeholders sa convention agod mahatagan sang technological solution ang mga gina-atubang nga problema pinaagi sa maid-id nga research extension kag commercialization.
Ginaagda naman ang tanan nga mag-explore sang bag-o nga mga ideya, magbuligay para sa kaayuhan, kag makapangita sang solusyon nga may dako nga epekto sa sosyudad.
