Natural lang nga kun kaisa, may mga adlaw gid nga daw wala ka na gana sa tanan.
Ugaling lang, bilang isa ka bread winner, may choice ka pa bala nga makapahuway?
Kun ikaw nasubuan, may personal problem? Heartbroken kag indi na maka-concentrate sa trabaho?
Sa pungsod China, ginadayaw ang isa ka kilala nga businessman sa retail industry nga si Yu Donglai bangud sa pinasahi nga inisyatibo sini nga gintawag nga “unhappy leave” para sa iya nga empleyado.
Ang employees sini ang mahimo nga maka-leave sang tubtob 10 ka adlaw sa sulod sang isa ka tuig kada masubuan ang mga ini ukon wala sa mood magtrabaho.
Magluwas sini sila ang nagapatuman man sang employee-friendly policies kaangay sang pito ka oras nga trabaho kada adlaw, day off kun weekend, 40 ka adlaw nga annual leave kag dugang nga lima ka adlaw nga pahuway kun Lunar New Year.
Nagahatag man si Donglai sang job-level certification system sa diin miski ang mga entry-level workers, pareho sang janitors, ang sarang makabaton sang sweldo nga balor P4 million kada tuig.
Suno kay Donglai, gusto sini mangin ehemplo sa kun ang ginatawag nga healthy work place.