Naglab-ot na sa 25,213 ka mga indibidwal ukon 8,031 ka mga pamilya ang apektado sang liwat nga paglupok sang Bulkan Kanlaon pasado alas-5 sang kaagahon kaina sang aga, Abril 8, 2025.
Ini ang sandig sa progress report on Eruption of Mount Kanlaon sang Department of Social Welfare and Development Field Office 6 – Westernm Visayas as of 4pm subong nga hapon.
Base sa report, naglab-ot na sa 23 ka mga kabaranggayan gikan sa ciudad sang Bago, La Carlota kag San Carlos lakip na ang mga barangay nga sakop sang mga kabanwahanan sang La Castellana, Moises Padilla, Murcia kag Pontevedra ang apektado sang paglupok sang Bulkan.
Samtang, nagapabilin naman nga yara sa 14 ka mga evacuation centers ang 1,770 ka mga pamilya nga ginbug-usan sang 5,673 ka mga indibidwal.
Padayun pa sa karon ang monitoring sang otoridad may angut sa liwat nga paglupok sang Bulkan kag ang padayun nga pagdul-ong sang bulig sa tanan nga mga apektado nga mga LGU.