Nagapasalamat ang ciudad sang Bago nga wala sila natam-an sang nagtupa ang abo nga ginbuga sang bulkan Kanlaon kahapon, Abril 8,2025.
Sa interview sang DYHB kay Bago City Mayor Nicolas Yulo, ginpahayag sini nga naka-eksperyensya lang sang light ash fall ang barangay Ilijan, Mailum kag Binubuhan kahapon.
Suno sa iya, wala sila maayo mabudlayan kahapon bangud wala naman sang mga Bagonhon nga nagpabilin sa sulod sang 6 kilometer danger zone.
Sa pihak nga bahin, nagapasalamat man ini sa Provincial Government of Negros Occidental sa pagpalab-ot sang bulig sa ila.
Aminado man si Yulo nga mas kinahanglan karon sang atensyon kag dugang nga bulig sang banwa sang La Castellana kag ciudad sang La Carlota sang sa ila sa Bago City.
Madumduman nga una na gin-report sang Philippine Volcanology and Seismology (Phivolcs) nga ang ciudad sang Bago, La Carlota kag banwa sang La Castellana ang lubos nga apektado sa aktibidad sang bulkan.