CANLAON CITY- Ginapatihan sang Bureau of Fire Protection- Canlaon City nga napalong na ang grassfire sa slope nga bahin sang Bulkan Kanlaon sa bulig sang ulan nga nagtupa kagab-i, Abril 8, 2025.
Ginpahayag ni Fire Officer 2 Bonieger Acaso, Admin Officer sang BFP- Canlaon City, mga pasado las-7 sang aga kahapon, ila namonitor nga may yara sang kalayo sa bahin sang bulkan, apang wala ini nila ginpadalungan bangod ginadumilian ang pagsulod sa 4 kilometer permanent danger zone.
Una na nga ginpahayag sang Science Research Specialist sang PHIVOLCS Kanlaon Volcano Observatory-La Carlota City nga si Pearly Sianson, nagluntad ang grassfire bangod sa superheated ballistic fragments ukon pagbuga sang bulkan sang mainit kag dalagko nga bato padulong sa kahilamunan.
Samtang suno kay Acaso, wala sang mga pananom sang mga mangunguma ang nadalahig sa sunog bangod sa lugar kun sa diin nagluntad ang grassfire ang puno sang kakugnan kag malayo sa mga panimalay.
Namonitor sang BFP nga nagdako ang kalayo las-5 sang hapon tubtob las-9 sang gab-i, matapos sini, nagbubo ang mabaskog nga pag-ulan sa lugar kag nangin zero visibility na sa bahin sang bulkan.
Sa karun, nagapabilin nga heightened alert ang BFP, ilabi na nga nagapabilin sa gihapon nga Alert Level 3 ang Bulkan Kanlaon.