Sa pihak sang kasakuon sa pagpangita kwarta, kun kaisa, dapat mag relax-relax man kita. Kag isa sa nakahiligan sang nga millenials kag Gen Z karon amo ang pag-trek ukon pagsaka sa bukid. Ugaling lang, challenging man kaayo ang pag-trek. Antis mo makita ang katahum sa palibot, literal nga pangabudlay gid anay. Isa ka mountain resort sa Jianxi, China, ang nag-invest sang minilyon ka dolyar para magpatindog sang daku nga escalator agud mapadali ang pagsaka sang mga tawo sa mga kabukiran. Ang kasakit kag kakapoy sa pagsaka sa babaw sang bukid ang kabahin lang sang memorable hiking experience, pero sa Lingshan Scenic Area sa Eastern China, Jianxi Province, mahimo na nga makalab-ot sa 1,500-metro nga kataason nga summit paagi lang sa pagsakay sa mga outdoor escalator. Ang ini nga proyekto ang ginhimo agud mabuligan ang mga tawo nga nagapang duha-duha saka sa babaw sang bukid agud makita ang katahom sang palibot. Nagsugod ang ini nga proyekto sang tuig 2022 kag ginapaabot matapos sa masunod nga bulan. Sa gin-post nga litrato kag mga video, makita ang kadamuon sang mga escalator nga nagakonektar halin sa idalom tubtob sa ibabaw sang bukid. Ang Tanyu Mountain sa Zhejiang Province, China, amo ang una nga nag-viral sang 2023 sa diin nagbutang sila sang escalator nga nagapadali sang pagsaka sa 350-metro nga kataason nga bukid. Apang, madamu sang iban pa nga lugar nga may kabukiran ang may kaangay man nga proyekto. Pila ka mga netizen ang nalipay kay bisan ang mga tigulang kag mga Person with disabilities ang mahimo na makatan-aw sang matahum nga tan-awon. Samtang, may iban naman nga nagasiling nga ginkuhaan sini sang kalipay ang hiking. Sa Lingshan, una, kinahanglan pa nga magsaka sang libo-libo ka tikang kag maglabay sang duha ka oras antes makalab-ot sa tuktok sang 1,500-metro nga bukid. Pero kon matapos na ang escalator nga proyekto sa masunod nga bulan, mahimo na ini nga malab-ot sang wala sing kapoy, sulod lang sang pila ka minutos.
