Ginahikot na sang ciudad sang Bago ang permanente nga relocation site para sa mga evacuees nga nahamtang sa danger zone sang bulkan Kanlaon.
Sa interview sang DYHB kay Bago City Mayor Nicolas Yulo, ginpahayag sini nga ila na na-determine kun diin ipahamtang ang permanent relocation site kag ila naman ini nasumiter kag ginpaaprubahan sa National Disaster Risk Reduction Management Council (NDRRMC).
Suno kay Yulo, ila nalang karon ginahulat nga masugdan na ang pag-develop sang permanent site agud masaylo na diri ang mga evacuees.
Apisar yara pa sa proseso ang permanente nga paga-istaran sang mga evacuees, ginpasuguro man ni Yulo nga maayo ang kahimtangan sang 22 ka mga pamilya ukon 80 ka mga indibidwal sa “Payag sang Kapag-on,” ang temporary evacuation site nga gintukod sang ciudad sa diin mga payag ukon bahay kubo ang karon gina-istaran sang mga pumuluyo.
Panawagan ni Yulo karon sa mga Bagonhon amo ang magpangamuyo lang nga magkulukalma na ang bulkan Kanlaon.
Panugyan man sini sa mga residente nga mag-coordinate sa ila tagsa ka mga purok ukon barangay officials para sa mga instructions pananglit maglala ang sitwasyon.