Gindesisyunan sang City Government sang La Carlota ang pag-postpone sang Pasalamat Festival 2025 bangud sang pag-alburuto sang Bulkan Kanlaon tinalikdan nga Martes, Abril 8.
Ginpahayag ni Mayor Rex Jalando-on, handa na kuntani ang tanan kag nabayaran naman ang pila ka mga artista nga mangin guest sa Pasalamat Festival nga gintalana sa Abril 21 tubtob 27.
Apang ginpabutyag sang alkalde nga padayon nga apektado ang ila mga pumuluyo kasunod sang pag-alburuto sang bulkan lakip naman ang padayon nga problema sa tubig nga nagaapekto sa kapin 3,000 ka mga pamilya sa Barangay Ara-al kag Barangay San Miguel.
Ginklaro naman sang alkalde nga paisulon lamang ang selebrasyon kag wala ini ginkanselar.
Gilayon naman nga hiwaton ang Pasalamat Festival sa tion nga magnubo ang alerto sang Kanlaon kag masolbar na ang problema sa tubig sa duha nila ka barangay.